ថ្ងៃចន្ទ ១១កើត ខែភទ្របទ ឆ្នាំកុរ ឯកស័ក ព.ស ២៥៦៣ ត្រូវនឹងថ្ងៃទី០៩ ខែកញ្ញា ឆ្នាំ២០១៩ លោក​ មាន ម៉ិក អនុប្រធានការិយាល័យក្សេត្រសាស្ត្រ និងផលិតភាពកសិកម្ម បានចុះតាមដានដំណាក់កាលលូតលាស់ស្រូវស្រែបង្ហាញពូជ ដែលគាំទ្រដោយគម្រោង Tica ប្រទេសថៃ របស់កសិករ ប៊ូ សំហេន និងកសិករ ប៊ន់ ម៉ាប់ នៅភូមិបន្សាយរាក់ សង្កាត់បន្សាយរាក់ ក្រុងសំរោង ដែលមានសកម្មភាពដូចជា​ បានចុះពិនិត្យក្នុងស្រែរបស់កសិករ ប៊ូ សំហេន ឃើញមានវត្តមាន ជំងឺ​ប្លាស កើតមានលើស្លឹកស្រូវចំនួនផ្ទៃដី០១ហិកតា ។ តាមរយៈ​ការអង្កេតផ្ទាល់ ចំពោះស្រែស្រូវពង្រោះដែលនូវជុំវិញ គឺមិនមាននូវវត្តមានជំងឺ​ប្លាសនេះទេ ដោយសារតែស្រូវពង្រោះគឺស្ថិតនៅក្នុងវគ្គបង្កបង្កើនផលទៅហើយ ចំណែកស្រូវសន្ទូងដែលមាននូវវត្តមានជំងឺ​ប្លាសគឺ​ ស្ថិតនៅក្នុងវគ្គលូតលាស់ និងបែកគុម្ព ដែលដើមដងស្រូវកំពុងតែមានសភាពខ្ចីល្អ មួយវិញទៀតគួបផ្សំនឹងលក្ខខណ្ឌអាកាសធាតុសមស្រប ធ្វើឱ្យដំណាំស្រូវងាយរងនូវឥទ្ធិពលជំងឺ​ប្លាសនេះកើតឡើង ។ សកម្មភាពបន្តចុះពិនិត្យស្រែ របស់កសិករ ប៊ន់ ម៉ាប់ ក្នុងការចុះពិនិត្យផ្ទាល់សង្កេតឃើញថា សម្រាប់ដំណាំស្រូវរបស់ កសិករ ប៊ន់ ម៉ាប់ គឺស្រូវលូតលាស់បានល្អ និងមានចំនួនដើមបែកចន្លោះពី២៥ដើម ទៅ៣០ដើម ក្នុង១គុម្ព ចំពោះវត្តមានសត្វល្អិត និងជំងឺ​មិនមានជាបញ្ហានោះទេ ហើយសម្រាប់ការបាចជីផ្តាច់គឺ ត្រូវបាចនៅចន្លោះថ្ងៃទី១៥ និងថ្ងៃទី២០ ខែកញ្ញា ឆ្នាំ២០១៩ ។ បញ្ហាដែលបង្កឱ្យមានវត្តមានជំងឺ​ប្លាសនេះគឺបណ្តាលមកពី៖ ដើមស្រូវលើសនូវកម្រិតជីអាសូត សំណើមប្រចាំថ្ងៃមានកម្រិតខ្ពស់ មេឃស្រទំ មានភ្លៀងធ្លាក់ញឹកញប់ និងរលឹមជាប្រចាំ ។ ជាលទ្ធផល ចំពោះកសិករ ប៊ូ សំហេន គឺបានផ្តល់អនុសាសន៍ឱ្យកសិករបង្ហូរទឹកចេញពីក្នុងស្រែឱ្យនៅក្រោមបង្គាបដើមស្រូវ និងប្រើថ្នាំពុលគីមីកសិកម្ម មានឈ្មាះថា ណាទីវ៉ូ ដែលមានធាតុសកម្ម (Trifloxystrobin, Tebuconazole) ផ្អាកការដាក់ជីបំប៉នជាពិសេស ជីអាសូត នៅក្នុងដំណាក់កាលដែលស្រូវកំពុងតែមានវត្តមានជំងឺ​ ៕