ថ្ងៃព្រហស្បតិ៍ ១៣ រោច ខែចេត្រ ឆ្នាំកុរ​ ឯកស័ក ពុទ្ធសករាជ ២៥៦២ ត្រូវនឹងថ្ងៃទី២ ខែឧសភា ឆ្នាំ២០១៩​ លោក​ បុិត ឆោម​និងលោក ហ៑ាង ពិសិដ្ឋ មន្រ្តី​ការិយាល័យផែនការ គណនេយ្យ បានចូលរួម​សិក្ខាសាលា​ស្តី​ពី​ ការរៀបចំផែនការយុទ្ធសាស្រ្តថវិកាឆ្នាំ២០២០-២០២២ នៅសណ្ឋាគារ​ កំពត ឌីយ៉ាម៉ង់​ ខេត្តកំពត​ ក្រោមអធិបតីភាពលោក ម៉ក់​ មុនី​ ប្រធាននាយកដ្ឋានផែនការ និងស្ថិតិ ក្នុងគោលបំណង​ណែនាំពីនីតិវិធី និងតម្រង់ទិសលើការរៀបចំផែនការយុទ្ធសាស្រ្តថវិកាឲ្យឆ្លើយតបទៅនឹងអាទិភាព​ និងគោលនយោបាយអភិវឌ្ឍន៍វិស័យកសិកម្ម និងពង្រឹងសមត្ថ​ភាព​អង្គភាព​ថវិកា​ទាំងកណ្តាល និងរាជធានីខេត្ត ក្នុងការ​រៀបចំ​ និងអនុវត្តផែនការសកម្មភាព និងថវិកាឱ្យមានប្រសិទ្ធភាពខ្ពស់​ ដោយមានអ្នកចូលរួមប្រមាណ៧០នាក់ ស្រី១០នាក់។ លោក​ ម៉ក់​ មុនី​ បានលើកឡើងថា​ ការរៀបចំផែនការនេះត្រូវឆ្លុះពីគោលបំណង និងគោលនយោបាយរបស់ក្រសួងនាអាណត្តិទី៥នេះ​ និងផ្តល់ធាតុចូលទៅឲ្យនាយកដ្ឋានផែនការ និងស្ថិតិ​ ដែលទាក់ទងនឹងកម្មវិធីទាំង០៥របស់ក្រសួង ដោយក្នុងនោះមានការកែសម្រួលឈ្មោះកម្មវិធីផងដែរ។ ជាកិច្ចបន្ត​ លោក​ ម៉ក់​មុនី​ បានបង្ហាញពីការរួមចំណែករបស់វិស័យកសិកម្មក្នុងសេដ្ឋកិច្ចជាតិ​ និងការរួមចំណែករបស់អនុវិស័យក្នុងវិស័យកសិកម្ម​។ លោកបន្តថា ផែនការ៥ឆ្នាំរបស់ក្រសួងបានកំណត់ដល់ឆ្នាំ២០២៣រួចហើយ ចុះមន្ទីរវិញអាចធ្វើបែបណាវិញក្នុងការកំណត់សូចនាករ? ជាមួយ​គ្នា​នោះ​ដែរ​ លោក​ស្នើឲ្យមន្ទីរជំនាញផ្តល់ផែនការយុទ្ធសាស្រ្តថវិកានោះមកនាយកដ្ឋានត្រឹមថ្ងៃទី០៦ ខែឧសភា​ ឆ្នាំ​២០១៩​ ដើម្បីក្រុមការងារមានពេលគ្រប់គ្រាន់ក្នុងការបូកសរុបឲ្យបានទាន់ពេលវេលា៕